حقيقي القرآن بيبقى ليه لذة تانية أما بتاخد بالك منها و تبتدي تطبقها في قرائتك .
هحاول أبسطها لكم على قد ما أقدر ، و عايزين نبدأ نطبقها من أول ما نعرف معانيها بإذن الرحمن .
( مـ )
إسمها " وقف لازم "
يعني أما تلاقيها في آية لازم تُقف عندها مينفعش تكمل ،
عشان لو كملت هتوهمك بمعنى تاني غير المقصود من الآية ،
فـ أنت أما تلاقي الرمز ده اعمل وقفة بسيطة كدة و بعدين كمل قراية إبتداء من الكلمة اللي بعدها ،
و ده مثال ليها ، جرب كدة تطبقها في الآية دي و هتلاحظ بنفسك الإختلاف في المعنى لو وقفت وقفة بسيطة .
( إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا ۚ فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِنْ رَبِّهِمْ ۖ
وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَٰذَا مَثَلًا ۘ يُضِلُّ بِهِ كَثِيرًا وَيَهْدِي بِهِ كَثِيرًا ۚ وَمَا يُضِلُّ بِهِ إِلَّا الْفَاسِقِينَ )
البقرة ﴿٢٦﴾ .
( قل? )
معناها " الوقف أولى من الوصل "
يعني لما تلاقيها من الأفضل انك تقف عند الكلمة دي لـ ثانية أو ثانيتين و بعدين تكمل قراية من الكلمة اللي بعدها ،
مفيش مانع لو موقفتش و كملت قراية ، لكن الأولى انك تقف عندها .
زي مثلاً :
( سَيَقُولُونَ ثَلَاثَةٌ رَابِعُهُمْ كَلْبُهُمْ وَيَقُولُونَ خَمْسَةٌ سَادِسُهُمْ كَلْبُهُمْ رَجْمًا بِالْغَيْبِ ۖ وَيَقُولُونَ سَبْعَةٌ وَثَامِنُهُمْ كَلْبُهُمْ ۚ
قُلْ رَبِّي أَعْلَمُ بِعِدَّتِهِمْ مَا يَعْلَمُهُمْ إِلَّا قَلِيلٌ ۗ فَلَا تُمَارِ فِيهِمْ إِلَّا مِرَاءً ظَاهِرًا وَلَا تَسْتَفْتِ فِيهِمْ مِنْهُمْ أَحَدًا ) الكهف ﴿٢٢﴾ .
( ج )
و إسمها " جائز " = جواز الوقف و الوصل .
و دي يعني مفيش مانع لو وقفت و انت بتقرأ أو كملت قراية ، كدة كدة المعنى من الآية صح ،
سواء وقفت عند كلمة معينة أو كملت .
زي مثلاً :
( وَاعْلَمُوا أَنَّ فِيكُمْ رَسُولَ اللَّهِ ۚ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ وَلَٰكِنَّ اللَّهَ حَبَّبَ إِلَيْكُمُ الْإِيمَانَ
وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ ) الحُجرات (7) .
( صل? )
و معناها " الوصل أولى من الوقف "
يعني لو لقيتها و انت بتقرأ من الأفضل و الأولى انك تكمل قراية ، و متعملش وقفة عند كلمة مُعينة .
زي مثلاً :
( قُلْنَا اهْبِطُوا مِنْهَا جَمِيعًا ۖ فَإِمَّا يَأْتِيَنَّكُم مِّنِّي هُدًى فَمَن تَبِعَ هُدَايَ فَلَا خَوْفٌ عَلَيْهِمْ وَلَا هُمْ يَحْزَنُونَ ) البقرة (38) .
( لا )
و دي معناها " الوقف ممنوع "
يعني لو لقيتها في أي موضع في القرآن لازم تكمل قراية ، مينفعش تُقف لأي سبب ، لأنك لو وقفت هتديك معنى تاني خالص غير المُراد من الآية ،
و عشان كدة بيسموه " الوقف القبيح " = عشان لو وقفت عندها هتغير معنى الآية تمامًا .
زي مثلاً :
( وَيَقُولُ الَّذِينَ آمَنُوا أَهَٰؤُلَاءِ الَّذِينَ أَقْسَمُوا بِاللَّهِ جَهْدَ أَيْمَانِهِمْ ۙ إِنَّهُمْ لَمَعَكُمْ ۚ حَبِطَتْ أَعْمَالُهُمْ فَأَصْبَحُوا خَاسِرِينَ )
المائدة (53) .
( ۛ ۛ )
و دي إسمها " تعانق الوصل "
العلامتين دول هتلاقيهم موجودين في كلمتين ، الكلمتين دول هيبقوا قريبين من بعض جداً
و غالباً هيكونوا في نفس الآية ،
و معناهم انك لما تلاقيهم لازم توقف قراية عند علامة منهم ، و تكمل قراية عند العلامة التانية ، الأمر اختياري ليك ،
يعني لو وقفت عند الأولى لازم تكمل عند التانية ، و العكس ، المهم انك لازم تعمل وقفة عند علامة منهم .
زي مثلاً :
( ذَٰلِكَ الْكِتَابُ لَا رَيْبَ ۛ فِيهِ ۛ هُدًى لِلْمُتَّقِينَ ) البقرة ﴿٢﴾ .
معاني العلامات دي هتفرق معاكم أوي أما تعرفوها و تبتدوا تطبقوها في حياتكوا ،
و لأن القُرآن كلام ربنا عز و جل فـ لازم نحاول على قد ما نقدر نقرأُه صح ❤
الخميس أبريل 11, 2024 10:27 pm
اللهم" إن لي من بين خلقك من طابت لي محبتهم،، وصفت لي بين القلوب مودتهم اللهم" أفتح لهم في هذا اليوم كل أبواب الخير وأغلق عنهم كل أبواب الشر وارزقهم الفرحة والسرور وأنر خطاهم بالنور انك عزيز غفور.
أسعد الله يومكم 
