آه وألف آه
كل ده يحصل يا مصر
في مدينة من قبل سنين
سموها المدينة الباسله
مباراة لا راحت ولا جت
فاز فيها فريق
وخسرنا فيها نفسنا
خرج الشباب مشجعين
رجعوا لذويهم مشيعين
مات الشباب في عز الشباب
وبدم بارد اتقتل
وبدون ميعاد
وأحداث محتاجه جواب
ومليون سؤال
ومفيش جواب
يا بلدنا شرطتنا غابت
وجنودنا للخونه سابت
فين المحافظ وفين المدير
ليه غابوا النهارده متعمدين
سؤال لكل المسئولين
تصفية حساب
مع اجمل شباب
كانوا حماة لثورتنا الجميله
وسط الميدان
التراس رجال
في غاية الجمال
استشهدوا هناك بعيد
فوق ارض كانت مقبره
لكل الغزاة
سالت دماهم في بورسعيد
في خطه حقيره مدبره
كلاب وعملتها مجزره
يا مصر قومي وأصرخي
انهضي بئا من سباتك
وألعني كل اللي فاتك
وألبسي توب الحداد
علي اللي ماتوا من ولادك
في ليلة سودا مغبره
راحو هناك يشجعوا
وسلموا علي أهلهم
قبل السفر
يدعوا لهم تاني يرجعوا
ميعرفوش أنهم
قبل السفر
لحياتنا كانوا بيودعوا
رايحين لرب أسمه الكريم
في الجنة مثواهم هناك
وعيونا عليهم يدمعوا
من بورسعيد كانت نهاية كل شيء
وفي بورسعيد يبقي السؤال
وصرخة م القلب بتنزف
وآه وألف آه
samir
الخميس أبريل 11, 2024 10:27 pm
