دي حاجة تفرس
لما نهاتي
ننادي ف مالطا
و يجي قرار و يجيب لنا جلطة
و لما نقول يا حكومة كفايا
يقولوا خلاص
معلش دي غلطة
يبقى بجد
مش حاجة تفرس !!
عدّا شهور و ايام و ساعات
و لسة بنعيش ف اشتغالات
و مفيش حاجة بيلهونا فيها
غير قرارات كان وقتها فات
يبقى بجد
مش حاجة تفرس!!
لما يقولوا
ابني ف بلدك
عمّر و انتج
كبّر فيها
و احنا معاكم
جيش مع شعب
لازم من بكرة هنبنيها
يجي الشعب
و لمّا اتحمس
يجي قرار بيحطم فينا
فين ثورتنا؟
فين كلمتنا؟
فين مطالبنا ووعدكوا بيها
يبقى بجد
مش حاجة تفرس!!
ليه تستنوا لما بنزهق
و ننزل من تاني التحرير
فين أحلامنا؟
فين أمانينا..اللي هتيجي مع التغيير؟
ده مفيش حاجة بتحصل خالص
غير شعارات
و كلامكوا كتير
يبقى بجد
مش حاجة تفرس!!
قلّ حماسنا
و رجع اليأس
بعد ما كان
عشنا احلى سعادة وفرحه
و بإصرارانا خلعنا نظام
ليه البطئ ف أي قرار حسوا شوية بس بينا
مش هنقول كان صبر و راح
بس حقول الرحمة
حرااااام .
*****************
بقلم / هايدى دياب
الخميس أبريل 11, 2024 10:27 pm
