رسالة لصديقي المسيحي..
ليه ياصاحبي..بتشيل ايدك من حضن ايدي؟؟
من امتى كانت بتفرق معانا نوع الديانة
من امتى بصينا لملة ولا دين
وكان مابينا دول مسيحيين او مسلمين
داحنا اتولدنا هنا في نفس المكان
وكبرنا ولعبنا على نفس التراب
وحتى يوم العيد لبسنا اللبس واحد
تفتكر اني افكر يوم اجرحك..
او اهينك او ادمر فرحتك
او بايدي تهون عليا افجرك؟
اياك تصدق اني ممكن اخدعك
ولو عايزني افكرك
يوم ماصحينا الصبح بدري
نجري نلحق الطابور
وضحكنا يومها لما نسينا نجيب فطور
ليه تصدق اني ممكن انسا شكلي
طب مانت شكلك هو شكلي
وهمومك هي مشاكلي
لسة عايزني افكرك؟
طب هاقولك اني مش ناسي معاك ذكرياتي
وبعتبرها هي اصلا دي حياتي
يوم وجعنا ع اللي سابنا وسهرنا يومها لوحدنا
كان مين معايا وقت همي وكان مين معاك يوم جرحك
مش برضه انا؟
فاكر زمان يوم ما اتفقنا نكون اكبر مثال
اننا اصدق مثال
مش هانسمع اي كلمة من حد قال
قالوا وِحدة قلنا احنا
قالوا فتنة قلنا لأه دا اكيد مش مننا
ليه عايزني انسا فرحة شفناها في عيون امنا
مش هتفرق ام مين ياصاحبي ماهو انت انا
يوم نجاحنا دعينا من قلوبنا لربنا
يوم فرحنا يوم ماييجي عيد علينا يضمنا
ياصاحبي مش هتفرق عيد لمين ماهو برضه كاان بيلم شملنا
اياك تفكر اني هاقدر في يوم امحي لعبة لعبناها في حينا
او افكر اني ابيعك او اقطف ورود ربيعك..من جنينة في ارضنا
انت اخويا وجاري وصاحبي
واللي وياه كانت طفولتي
وعشت معاه ايام صبايا واتشد فيه عود رجولتي
ليه ياصاحبي بتشاورلي على الديانة
من امتى كان اللي بينا مكتوب في خانة
دا عدوك هو نفسه كان عدوي
واللي فجر مشكلة لا هو منك ولا من دمي
دا واحد كان فاكر هايقدر يهزنا
بس الاكيد انه مشربش من نيل مصرنا
واياك تسيبه يهد العشرة اللي بينا
او يفرق شملنا
تفتكر نديله فرصة يهدنا؟
الخميس أبريل 11, 2024 10:27 pm
