قلبي ف حضرتِك درويش
بيتلفّت يمين و شمال
بيتوضّا بنور وجهك
و بيصلّي صلاة الحب
بيتمنى يطول فجرك
و توبه الخيش ما بيدفّيش
و بيسرسب هموم و ذنوب
و حالف عمره ما يسيبك و لو سيبتيه
و لا حتى ف يوم حايتوب
هدمتِك ما بتغطّيش
لقمتِك ما بتكفّيش
مايّتك ليه ما بترويش
بتتشقّق شفايفه يجفّ الحلق
و إنتي الأغلى على قلبه
في وسط الخلق
حكاوي كتير بيحكيها
على صدره جبال من هم
و لا بيهتم غير بيكي
خطاوي كتير بتتبعتر على السكّه
يتوه من تاني ف عنيكي
يمدّ إيديه لإديكي
تخافي تمسكي فيهم
يعيد الكرّه من تاني
و لا بيزهق و لا بيملّ
يدوب في كعبك الداير
تتقطّع حبال الصبر
و يرجع تاني يتهجّى حروف إسمك
يحلى المرّ
ماهوش قادر على بعدِك
صراحته فيكي فايقه الحدّ
راحت سنينه ......
أحلام شحاته
الخميس أبريل 11, 2024 10:27 pm
