فكره ....للشاعرسعيد شكرى

مش بس ريح الشوق معندانى
مش بس ظلم الليل لوحدانى
مش بس برد الوحدة والحرمان
ولآ جرحى منك وانتى سمعانى

الفكرة مش ف البعد والفرقة
ولا انتظار ايام ماهيش فارقة
ولا احتكام الصيف لشتواية
تلمح عيونك فى السما الزرقا

الفكرة ان الحب طفل برئ
محتاج حنان منك يبل الريق
محتاج رموشك بيت وضليلة
ماتحكميش البرد ف المخاليق

لفى القلوب بالضى لفيهم
صحى الجمال الحى فعنيهم
صحى اللى باقى من مشاعرهم
قلبك فاكرهم ولآ ناسيهم ؟!!

قلبك ستاير فرح منقوشة
قلبك عروسة بتنتظر كوشة
قلبك مراية وحبنا الفستان
وبتظلميه بالكتمة والحوشة

شايفة العطش ع الورد فاده بايه
شايفة الندى و الخد باقى عليه
شايفة الاغانى ف انتظار كلمة
يلا انطقيها ورقصى الكوبليه